Честитка до просветните работници

Почитувани наши просветни работници,

Честит 24-ти Мај, Денот на македонските и сесловенските просветли и учители, Светите браќа Кирил и Методиј.

Денес го чествуваме нивното вонвременско дело и уште еднаш со огромна благодарност се сеќаваме на непроценливото наследство кое го оставија за нас Македонците и сите словенски народи нашите македонски просветители и учители, Светите браќа Кирил и Методиј.

Мисијата на Светите браќа е овозможување на словенските народи сами да го спознаваат Божјото слово, сами да ја создаваат и да ја пренесуваат својата култура и традиција, и сами да ја пишуваат својата историја.

Живописот на Светите браќа сведочи за големината на човековата верба, упорност и истрајност, за непобедливоста на правичноста и  нескршливоста на човечкиот дух. 

Наша должност кон Светите браќа кои ни дадоа АзБука, кон учебникарите кои нè образуваа, кон преродбениците кои нè просветлуваа, кон писателите и поетите кои го подмладуваа и до восхит го надградуваа нашиот македонски јазик, е одговорно да го користиме јавно изговорениот и пишаниот збор. Бидејќи нашиот премудар Конески ни кажа дека нашиот јазик е единствената наша комплетна Татковина, која сме должни секогаш, а особено во време на предизвици, да ја чуваме со зборови на сплотеност и почитување, независно од нашите идеи, погледи и ставови.

Вие нашите просветни работници, сите учители, наставници и професори со својата непроценлива работа сте светилниците на нашиот образовен систем, чуварите и пламенот што го грее нашиот македонски јазик и македонската памет.

Нека е вечно делото на нашите македонски учители и сесловенски просветители, Светите браќа Кирил и Методиј и нека ни е за многу години празникот на македонските просветни работници!

Љупчо Димовски

Претседател на СПМ